ఒక సాధారణ వ్యక్తిని అసాధారణ నాయకుడిగా మార్చేది అతను ఎంచుకునే మార్గము, అతను తన చుట్టూ ఉంచుకునే మనుషులే. సమాజంలో మనిషి పుట్టుకతోనే ఒక గుర్తింపును తెచ్చుకోవచ్చు, కానీ ఆ గుర్తింపును గౌరవంగా, విలువగా మార్చుకునేది మాత్రం అతను ఎంచుకునే సహవాసం మరియు పరిసరాలే. మంచివారితో స్నేహం మనల్ని ఎప్పుడూ ఉన్నత స్థానానికి తీసుకెళ్తుంది. మనల్ని మనం సరైన స్థానంలో ఉంచుకోవడమే మనం మన జీవితానికి ఇచ్చుకునే అతిపెద్ద గౌరవం.
ఒక చిన్న ఈగ కూరగాయల త్రాసుపై కూర్చుంటే దానికి ఎలాంటి విలువ ఉండదు, దాని బరువును ఎవరూ లెక్కించరు. కానీ అదే ఈగ ఒక బంగారపు త్రాసుపై కూర్చుంటే, తులాభారంలో దాని బరువు కూడా వేల రూపాయల విలువైన బంగారంతో సమానంగా తూగుతుంది. ఇక్కడ ఈగలో ఎలాంటి మార్పు రాలేదు, కానీ అది కూర్చున్న స్థానం మారడం వల్లే దాని విలువ ఒక్కసారిగా పెరిగిపోయింది. మనిషి జీవితానికి, నాయకత్వానికి కూడా ఈ స్థాన బలం అనే సూత్రం అచ్చంగా వర్తిస్తుంది.
సాధారణ లోహమైన ఇనుము అయస్కాంతంతో జతకూడితే దానికి కూడా ఆకర్షణ శక్తి వస్తుంది. అలాగే ఒక నీటి చుక్క వేడి పెనంపై పడితే ఆవిరైపోతుంది, లోటస్ ఆకుపై పడితే ముత్యంలా మెరుస్తుంది, అదే స్వాతి కార్తెలో సముద్రపు ముత్యపు చిప్పలో పడితే నిజమైన ముత్యంగా మారుతుంది. నీటి చుక్క ఒక్కటే అయినప్పటికీ, అది ఆశ్రయించిన స్థానాన్ని బట్టి దాని రూపం, విలువ పూర్తిగా మారిపోయాయి. నేటి 21వ శతాబ్దపు ఆధునిక సమాజంలో నాయకులైనా, విద్యార్థులైనా, సామాన్యులైనా తమ సమయాన్ని ఎక్కడ పెట్టుబడిగా పెడుతున్నారనేదే ముఖ్యం.
ఒక గొప్ప నాయకుడు ఎప్పుడూ ఆదర్శవంతమైన సహవాసాన్ని కోరుకుంటూ తన చుట్టూ తెలివైన, నిపుణులైన, సృజనాత్మక ఆలోచనలు ఉన్నవారినే ఉంచుకుంటాడు. జ్ఞానులు, నిరంతరం సమాజ హితాన్ని కోరేవారితో నడిచినప్పుడు వారిలోని సద్గుణాలు మనకు తెలియకుండానే మనకు అలవడి, సమాజంలో మన విలువ రెట్టింపు అవుతుంది. ఎంతటి ప్రతిభ ఉన్నా, సృజనాత్మకత లేని మనుషుల మధ్య ఉండిపోతే ఆ ప్రతిభ గుర్తించబడదు. దీనితో పాటు మాట తప్పకపోవడం, సమయ పాలన పాటించడం అనేది నాయకుడి విశ్వసనీయతను వేల రెట్లు పెంచుతుంది.
ఉత్తమ నాయకుడికి వివేకంతో కూడిన నిర్ణయాధికారం, నిస్వార్థ సేవా గుణం అత్యంత అవసరం. కూరగాయల త్రాసులాగా ప్రతి చిన్న విషయానికి చలించిపోకుండా, బంగారపు త్రాసులాగా అత్యంత సూక్ష్మమైన, విలువైన విషయాలను కూడా నిశితంగా పరిశీలించి నిర్ణయాలు తీసుకోవాలి. భావోద్వేగాలకు లోనవకుండా, వివేకంతో ఆలోచించేవాడే నిజమైన మార్గదర్శకుడు అవుతాడు. అలాగే మొక్కలు నాటడం, పర్యావరణాన్ని రక్షించడం, సమాజ ఆరోగ్యానికి తోడ్పడటం వంటి సేవా కార్యక్రమాల్లో ముందుంటూ నిస్వార్థంగా సమాజ హితం కోసం పాటుపడాలి.
నాయకత్వం అనేది ఒక పదవి కాదు, అదొక సామాజిక బాధ్యత. “నువ్వు ఎలాంటి వాడివో చెప్పాలంటే… నీ స్నేహితులెవరో చూపించు” అన్నట్లు, ఒక నాయకుడి విలువ అతను ఎంచుకున్న ఆశయాలు, అతను నడిచే దారి మరియు అతని వెనుక నడిచే బృందం పైనే ఆధారపడి ఉంటుంది. మనం కూర్చునే స్థానం మన విలువను నిర్ణయించినట్లే, ఒక నాయకుడు కూర్చునే పీఠం అతని సద్గుణాల వల్లే గౌరవాన్ని పొందుతుంది. కాబట్టి మనం ఎవరితో కూర్చుంటున్నాం, ఎలాంటి ఆలోచనలతో సమయాన్ని గడుపుతున్నాం అనే విషయంలో నిరంతరం అప్రమత్తంగా ఉన్నప్పుడే నాయకత్వం రాణిస్తుంది.
Leave a Reply